Teesri ke Chand ki Kahani

[Mahvash Fatima]

Kisi mulk mein ek badshah aur uska wazeer tha. Dono lavald the. Ek din Malika baramde mein raunaq afroz thi. Kya dekhti hai ke ek faqeer ne tamam gharon par bheek mangi, magar Badshah ke dar par nahi aya. Malika ne admi bhej kar faqeer ko bulwaya aur sona chandi dena chaha. Lekin faqeer ne lene se inkar kar diya aur kaha main baanjh ghar ki bheek nahi leta. Yeh sun kar Malika ko bahot ranj hua aur bohot royi. 

Jab Badshah ghar mein aya aur biwi ko rote dekha toh rone ka sabab daryaft kiya. Malika ne kaha ke aj ek faqeer aya aur tamam gharon se bheek mangi lekin hamari bheek lene se inkar kiya kyunki khuda ne hame dualat aulad se sarfaraz nahi kiya.

Badshah ne kaha ke woh faqeer kidhar gaya? Malika ne faqeer ke jane ki simt bata di. Badshah nange sar aur nange pair us taraf chala gaya. Jungle mein pahunch kar dekha ke ek zaeef admi daraqt ke neeche namaz padhne mein masroof hai.

Badshah wahin thahar gaya. Namaz khatm hone ke baad Badshah ne kaha, Peeron Mursheed! Kya aap wahi sahab hain jinhone mujh badnaseeb ke ghar se bheek lene se inkar farmaya? Faqeer ne kaha, han! Main wahi hun. Lekin tum mere paas kyun aye ho? Badshah ne kaha, Shah Fanah! Main us waqt tak yahan se nahin jaunga, jab tak mere naseeb na badal jaen. Ab aap hi koi zariya batlaen ke hum daulat ke khazane se us be jahan daulat ko hasil karen. Badshah ki mannat wa saamajat ko dekhte huwe faqeer ne ek lakdi badshah ko di aur kaha ke falan baagh mein jakar aam ke daraqt par is lakdi ko maro, jitne phal giren unko yahan par le ao aur zyada hawas mat karna.

Badshah faqeer ke kehne ke mutabiq baagh mein gaya aur lakdi aam ke daraqt par mari. Sirf ek phal zameen par gira. Badshah ne aur phal girane chahe aur dobara lakdi ko daraqt par mara lekin lakdi daraqt mein atak gayi aur koi phal na gira.

Badshah ne faqeer ke paas akar sari kaifiyat bayan ki. Faqeer ne dusri lakdi di. Badshah se kaha ke is lakdi se pehli wahi nikal kar mujhe la kar do.

Badshah ne is ladki se pehli lakdi nikali. Phal aur dono lakdiyan lakar faqeer ke hawale kar din. Faqeer ne phal Badshah ko de kar kaha, baba tumhare naseeb mein ek hi aulad hai. Yeh phal le jao aur tum dono miyan biwi naha kar ek kamre ko sandal se leepo aur wahan baith kar tum dono is phal ko khao. Badshah apne mahal wapas aya aur Malika ko phal de kar tamam waqeya bayan kiya.

Dono miyan biwi usi waqt nahaye aur ek kamre ko sandal se leep kar dono miyan biwi ne milkar phal ko khaya. Yeh khabar kisi tarah wazeer ki biwi ke kano tak gayi. Wazeer ki biwi ne fauran naukaron ko bhej kar Badshah aur Malika ke khaye huwe phal ke chhilke ko mangaya. Wazeer aur uski biwi ne naha kar ek kamre ko leep kar chhilka aur guthli kha liye. Khuda ki qudrat se dono hamla ho gayin aur 9 mahine ke baad dono ke yahan ladke paida huwe. Tamam shahar mein khushiyan manai gayin. Badshah ne najumiyon ko talab kar ke un bachchon ke halat daryaft kiye. Najumiyon ne ek zuban ho kar kaha ke bachchon ko barah baras tak jokham hai. Unko na kahi bahar nikalna aur na kahin jane dena aur unse na kabhi shikar ka zikr karna. Barah baras tak bahot ehteyaat se kaam lena. Badshah ne Wazeer se kaha ke munadi kar do ke unke samne koi shikar ka naam na le. Un dono bachchon ko ek hi jagah rakhenge. Chunanche un dono ke liye alehda makaan banwaya gaya, jahan koi guzar na sake. Usi makan mein dono rehne lage aur wahin dono ladkon ki parwarish hone lagi. Ek din Wazeer zada makaan ke raushan daan se bahar dekh raha tha. Ek budhiya ko dekha, jo pani ka ghada liye ja rahi thi. Usne us budhiya ke ghade par patthar mara. Usne kaha mujh budhiya se mazaq karne mein kya lutf ayega? Maza toh jab ayega jab shikar khelo. Yeh keh kar budhiya chali gayi. Wazeer zade ne badshah zade se shikar ka zikr kiya aur kaha hum dono zaroor shikar ko jaenge. Dono ne ahed kar ke khana peena chhod diya. Yeh khabar jaise hi badshah ko maloom hui toh fauran ladkon ke paas aya aur khana na khane ka sabab puchha. Shehzadon ne kahan hamko shikar khelne ki ijazat dijiye. Jab tak ijazat na milegi hum khana na khaenge.

Badshah najumiyon ki baat bhool gaya aur shehzadon se kaha yeh kya badi baat hai? Tum khana kha lo main tumko shikar ki ijazat deta hun. Shikar ki ijazat milte hi dono ne khana kha liya. Fauj aur jameeyat ke saath shikar ki tayyariyan hone lagin. Jungle mein jane ke baad ek hiran dikhai diya. Dono ne hiran ke peechhe ghoda dala aur bohot door hiran nazron se ghayab ho gaya. Shehzada hiran ke peechhe nikal gaya. Dono alehda ho gaye. Jab lashkariyon ne dekha bahot der ho gayi, dono alehda ho gaye, nahi aye toh tamaam sipahiyon ne sara jungle chhaan mara. Dono ka kahin pata na chala. Akhir majboor ho kar shahar ko wapas huwe aur Badshah se sara waqeya bayan kiya ke wazeer zade aur shah zade dono ek hiran ke peechhe nikal gaye. 

Hum sab ne tamam jungle chhaan mara lekin dono ka kahin pata na chala. Idhar shah zade aur wazeer zade hiran ke taqub mein bahot door nikal gaye. Hiran nazron se ghayab ho gaya. Shehzada bahot thak gaya aur wazeer zade se kaha mujhe bahot shiddat ki pyas lag rahi hai. Kahin se pani talash kar ke lao. Wazeer zade ne kaha. Bahut achhi baat hai. Aap yahan tashreef rakhiye, main pani lene jata hun. Yeh keh kar wazeer zada pani ki talash mein nikal gaya. Tamam jungle chhan mara, pani kahin na mila. Ek aurat ko wazeer zade ne dekha jo tarbooz liye baithi hai. Wazeer zade ne kahan ise kya kehte hain? Usne kaha ise tarbooz kehte hain. Yeh khane ki cheez hai. Kaha kya yeh pyas ko dur kar sakta hai? Wazeer zade ne ek asharfi dekar use khareed liya. Aur katne ke liye ek lakdi ka tukda lekar ek rumal mein bandh kar chala. Aisi tez aandhi ayi ke dono bichhad gaye. Wazeer zade ne dekha ke shahzada gayab ho gaya. 

Idhar badshah ne apne aadmi charon taraf daudae ke dono ko talash kar ke laen. Kuch dur unhone ja kar dekha ke wazeer zada chala aa raha hai. Wazeer zade ko badshah ke samne pesh kiya gaya. Badshah ne puchha ke shahzada kahan hai? Jawab diya ke main khud unki talash kar raha hun. Na maloom kidhar nikal gaye. Badshah ne puchha rumal mein kya hai? Jab rumal khola gaya toh tarbooz ke bajae shahzade ka sar tha aur lakdi ke bajaye chhuri thi. Badshah yeh dekh kar aag babula ho gaya. Wazeer ko bula bheja. Shahzade ka sar dikhaya. Wazeer ne kaha jahan panah! Aap ke bete se azeez mera beta nahi hai. Aap jo chahen saza de sakte hain. Badshah ne kaha achha aaj ise qaid rakho. Kal iski gardan maar di jaegi. Chunacha raat bhar usko qaid rakha, aur shahar mein munadi kardi gayi ke kal wazeer zade ki gardan maar di jaegi. Dekhne ke liye ek majmae kaseer jama ho gaya. Jab subah uski gardan marne ko le jane lage toh usne kaha, main marta hun! Ise badshah mujhe naha dho kar do rakat namaz padhne ka mauqa de de. Is par log chasm goiyan karne lage. Lekin ek peer mard bola ke kyun aisa kehte ho? Isko namaz padh lene do. Akhir kaar sab raazi ho gaye. Samne bawli thi. Wazeer zada bawli mein utar gaya. Kya dekhta hai ke bawli mein ek lota hai, uski barah totiyan hain. Chand lote ke muh se andar dakhil hota hai aur totiyon mein se nikalta hai. Wazeer zada hairat zada ho kar dekhne laga. Akhir log cheekhne lage ke kab tak nahaega? Jaldi nikal! Waqt ho raha hai. Usne jaldi se naha kar namaz ada kar li. Aur kaifiyat ko peer mard se bayan kiya. Peer mard ne kaha tune teesri tareeq ka chand dekha hai, isliye tu musibat mein giraftar hai. Agar kahani kisi ko maloom ho toh sun warna khud hi apna ahwal… Jab wazeer zade ne mann wa ann apna sara qissa bayan kiya aur unke sath gaya, ek qillat jama thi. Jallad uski gardan marne hi wala tha ke jungle mein gard wa gubaar utha aur usme se ek shaks ghode par namudar hua. Woh shaks majme ko cheerta hua dakhil hua aur puchha yahan sab kyun jama hain? Sabon ne kaha ke wazeer zada shahzade ka qatil hai, isliye uski gardan maar rahe hain. Shahzade ne jallad se kaha yeh begunah hai, ise mat maro. Yeh keh kar wazeer zade ka hath pakad kar badshah ke paas le gaya aur kehne laga Abba jaan! Aap yeh kya kar rahe hain? Agar mere ane mein zara bhi der hoti toh ek khoone nahaq aap ki gardan par hota. Badshah ne hairat zada ho kar jab woh potli mangwai aur usko khola toh usme tarbooz aur lakdi nikli. Wazeer ne age badh kar kaha aap ki saltanat aap ko mubarak ho! Main apne bachche ko kahi le kar chala jaunga. Duniya mein sab cheez milegi magar aulad nahi milegi. Badshah ne kaha galti insan hi se hoti hai. Yeh saltanat tumhari hi hai. Kya majal hai tum par koi nazar uthaye. Uske baad wazarat ki chabhiyan wazeer ko wapas kin. Aur sab hasi khushi rehne lage.

Teen baar kahani teen nauchandiyon tak, har nauchandi jumeraat ko shakkar ya mithai par nazr-e-maula Ali((عليه السلام).) den. Surah hamd, qulhowallah aur inna anzalna padh kar Muhammad ale Muhammad par salwat kahen aur kahen ke mujh par teesri chand ka asar na ho aur uski nahusat zail ho. 

[MOD NOTE: To reply to this topic, click on the "Submit REPLY" button. Do not click on the Report button. Thank you.]

Edited October 29, 2025 by Hameedeh
Mod Note